RSS

Category Archives: ಹಂಗೆ ಇವು ಒಂದಿಟು ಇಟ್ಟುಕೊಳ್ಳಿ

ಪೇಜ್ 3 ಜರ್ನಲಿಸ್ಟ್ ಗಳ ತಿಳುವಳಿಕೆಯ “ಬರ”

ಇಂಗ್ಲೀಷ್ ಪತ್ರಿಕೆಗಳಿಗೆ ಅಂಟಿದ ಈ ಜಾಢ್ಯ ಅದೆಂದು ಗುಣಮುಖವಾಗುತ್ತದೆಯೋ ದೇವರೆ ಬಲ್ಲ. ಇತ್ತೀಚಿನ ಯುವ ಪತ್ರಕರ್ತರಿಗೆ ಕನ್ನಡ ಸಾಹಿತ್ಯ ಮತ್ತು ಸಾಹಿತಿಗಳ ಕುರಿತಾದ ತಿಳುವಳಿಕೆ ಅದೆಷ್ಟಿದೆ ಎಂಬುದು ಆಗಾಗ ಜಗಜ್ಜಾಹೀರಾಗುತ್ತಿರುತ್ತದೆ. ಅದರ ಒಂದು ಸ್ಯಾಂಪಲ್ ಇಲ್ಲಿದೆ ನೋಡಿ. ರಾಜ್ಯದ ಅಗ್ರಗಣ್ಯ ಆಂಗ್ಲ ದಿನಪತ್ರಿಕೆ ಎಂಬ ‘ಹೆಗ್ಗಳಿಕೆ’ ಹೊಂದಿದವರ ಇಂದಿನ ಪುರವಣಿಯಲ್ಲಿ ಸಾಹಿತಿ, ನಿರ್ದೇಶಕ ಬರಗೂರು ರಾಮಚಂದ್ರಪ್ಪನವರ ಹೆಸರನ್ನು ಪರಗುರು ಎಂದು ಪ್ರಕಟಿಸಿದ್ದಾರೆ. ಅದು ಈ ತಪ್ಪು ಎರಡು ಕಡೆ ಪುನರಾವರ್ತನೆಯಾಗಿದೆ. ಪತ್ರಿಕೆಯ ತುಣುಕನ್ನು ಒಂದು ಸಾರಿ ಗಮನಿಸಿ…..(ಮುಂದಿನ ಕೆಂಪು ಅಕ್ಷರಗಳ ಮೇಲೆ ಕ್ಲಿಕ್ ಮಾಡಿ) ಆತುರದ ಅವಘಡವೋ..ಅರೆ ತಿಳುವಳಿಕೆಯ ಪ್ರತಿಫಲನವೋ..?

 

ರೂಪಾಯಿ ರಾಜ…!!!!!!

ಈ ನೋಟಿನ ಮೇಲೆ ಬರೆದಿರುವ ಅಕ್ಷರಗಳ ಮೇಲೆ ಕೊಂಚ ಕಣ್ಣಾಡಿಸಿ. ಹಣ ಕಂಡರೆ ಹೆಣವು ಬಾಯಿಬಿಡುತ್ತದೆ ಎಂದು ಹೇಳುವಾಗ ‘ಈ ಹಣ ಪಡೆದವರು ಹೆಣವಾಗುತ್ತಾರೆ’, ಎಂಬ ಹೇಳಿಕೆ ನೋಡಿದರೆ ನಗಬೇಕೋ, ಅಳಬೇಕೋ ನೀವೆ ಹೇಳಿ. ದಾಸರೆ ಹೇಳಿದ್ದಾರೆ, ‘ಹಣವೇ ನಿನ್ನ ಗುಣವೇನು ಬಣ್ಣಿಸಲಿ, ಹಣವಿಲ್ಲದವ ಹೆಣಕು ಕಡೇ ಕಂಡೆ’, ಎಂದಿರುವಾಗ ಸಿಕ್ಕ ದುಡ್ಡನ್ನ ಎಸೆಯೋದಿಕ್ಕಾಗುತ್ತಾ! ಕೊಂಚ ನಗೆ ಉಕ್ಕಿಸಿದರು, ನೋಟಿನ ಮೇಲೆ ಇಂತಹ ವಿಕಾರಗಳನ್ನು ಸೃಷ್ಟಿಸುವುದು ಎಂತಹ ಹೇಯ ಮನಸ್ಥಿತಿ ಎಂದೆನಿಸುತ್ತದಲ್ಲವೆ! ಏಕೆಂದರೆ ನನಗನ್ನಿಸಿದಂತೆ It Happens Only In India!?

ಹಣವೇ ನಿನ್ನ (ಅವ)ಗುಣವೇನು ಬಣ್ಣಿಸಲಿ...

ಹಣವೇ ನಿನ್ನ (ಅವ)ಗುಣವೇನು ಬಣ್ಣಿಸಲಿ...

 

ಟ್ಯಾಗ್ ಗಳು:

ಶೀಘ್ರವೇ ನಿಮ್ಮ ಮುಂದೆ….

ಪ್ರಿಯ ಸ್ನೇಹಿತರೆ,ನಾನು ಈ ಬ್ಲಾಗಿಗೆ ಒಂದು ವರ್ಷ ತುಂಬಿದ ಸಂದರ್ಭದಲ್ಲಿ ನಿಮಗೆಲ್ಲಾ ಹೇಳಿದ್ದೆ, ಆದಷ್ಟು ಬೇಗ ಬ್ಲಾಗಿಗೆ ಹೊಸ ರೂಪ,  ವಿಶಿಷ್ಟ ರೀತಿಯ ಬರವಣಿಗೆ ನೀಡುತ್ತೇನೆ ಎಂದು. ಅಂದರ ಒಂದು ಪ್ರಯತ್ನವಾಗಿ ಈ ಹೊಸ ವಿಭಾಗ ಜೀವ ತಳೆಯಲಿದೆ. ಇದು ನನ್ನ ಹಳೆಯ ಯೋಚನೆಗೆ ಒಂದಿಷ್ಟು ಹೊಸ ರೂಪ ತುಂಬುವ ಕೆಲಸ. ಹೆಸೆರೇನು ಎಂದು ಕೇಳಬೇಡಿ. ಅದು ಅಂದೇ ಕಾಣಿಸಿಕೊಳ್ಳುತ್ತದೆ. ಇದು ಅತ್ಯದ್ಭುತ ಆಲೋಚನೆ  ಎಂದು ಹೇಳುತ್ತಿಲ್ಲ. ಆದರೆ ವಿಶಿಷ್ಟ ಬರವಣಿಗೆಯ ಮೂಲಕ ನಿಮ್ಮಲ್ಲೊಂದು ನಗೆ ಬುಗ್ಗೆ ಹುಟ್ಟಿಸುವ ಪ್ರಯತ್ನ. ನೀವು ಈ ಅನುಭವಕ್ಕೆ ಒಳಗಾಗಿರುತ್ತೀರಿ ಅದನ್ನು ಮರಳಿ ನೆನಪಿಸುವ ಮತ್ತು ಆ ಅನುಭವಕ್ಕೆ ಮತ್ತೆ ಯತ್ನಿಸುವಂತೆ ಮಾಡುವ ಸಾಹಸ ಅಷ್ಟೇ!

ಗೆಳೆಯರೇ, ಶೀಘ್ರದಲ್ಲೆ ಆ ಯೋಚನೆಯನ್ನು ಕಾರ್ಯರೂಪಕ್ಕೆ ಇಳಿಸುತ್ತೇನೆ. ನಿಮ್ಮ ಹಾರೈಕೆ ಮತ್ತು ಬೆಂಬಲ ಎಂದಿನಂತಿರಲಿ……..

 

ಟ್ಯಾಗ್ ಗಳು:

ಹೀಗೊಂದು ಅಪರೂಪದ ಸನ್ನಿವೇಶ ನಮ್ಮ ಧಾರಾವಾಹಿಯಲ್ಲಿ…

ಈ  ದಿನ ಟಿವಿ ಹೇಗೆ ನಮ್ಮ ಬದುಕಿನ ಅವಿಭಾಜ್ಯ ಅಂಗವಾಗಿದೆಯೋ, ಹಾಗೇ ಅದರಲ್ಲಿ ಬರುವ ಧಾರಾವಾಹಿಗಳು ಚಾನೆಲ್ ಗಳಿಗೆ ಅತಿ ಹೆಚ್ಚು ದುಡ್ಡು ಮತ್ತು ಟಿಆರ್ ಪಿ ತರುವ ಸರಕುಗಳಾಗಿವೆ. ಭಾರತದ ಹೆಚ್ಚಿನ ಮನರಂಜನಾ ವಾಹಿನಿಗಳಲ್ಲಿ ದಿನದ ಹೆಚ್ಚು ಸಮಯ ಮೀಸಲಾಗಿದ್ದು ನೀವು ಹೇಳುವಂತೆ ಚುಯಿಂಗ್ ಗಮ್ ನಂತೆ ಎಳೆಯುವ ಧಾರಾವಾಹಿಗಳಿಗೆ. ಮಧ್ಯಾಹ್ನ ಮರುಪ್ರಸಾರವಾದರೆ ಸಂಜೆಯಿಂದ ಫ್ರೆಶ್ ಎಪಿಸೊಡ್ ಗಳು ನಿಮ್ಮ ಮುಂದೆ ಹಾಜರಾಗುತ್ತವೆ. ಕ್ಷಮಿಸಿ ನೀವು ಅವುಗಳ ಮುಂದೆ ಹಾಜರಾಗುತ್ತೀರಿ. ಆದರೆ ಹಲವು ಜನರಿಗೆ ಧಾರಾವಾಹಿಗಳನ್ನ ವೀಕ್ಷಿಸುವುದು ಸಮಯ ಕಳೆಯುವದಕ್ಕೆ ಅಥವಾ ದಿನಾ ನೋಡಿ ಅದೇ ಅಭ್ಯಾಸ ಆಗಿ ಹೋಗಿರುವುದಕ್ಕೆ. For a change ನನಗೆ ಧಾರಾವಾಹಿ ವೀಕ್ಷಣೆ ಕಾಯಕ. ಅದು ನನ್ನ ಫುಲ್ ಟೈಮ್ ವೃತ್ತಿ. ಚಾನೆಲ್ ನ ಆಫೀಸ್ ನಲ್ಲಿ ಕುಳಿತು ಬೆಳಗ್ಗೆಯಿಂದ ಸಂಜೆಯವರೆಗೆ ಧಾರಾವಾಹಿಗಳ ಗುಣಮಟ್ಟ ಅಳೆಯುವುದೆ ನನ್ನ ಕೆಲಸದ ಪರಿ. ಇಷ್ಟೇಲ್ಲಾ ಹೇಳಿದ್ದು ನಾನೇನು ವೃತ್ತಿ ಮಾಡುತ್ತೇನೆ ಎಂದು ಹೇಳಿಕೊಳ್ಳುವುದಕ್ಕಲ್ಲ. ದಿನ ನಿತ್ಯ 08,10 ಎಪಿಸೋಡ್ ಗಳನ್ನು ನೋಡುವ ನನಗೆ ಎಷ್ಟೋ ಸನ್ನಿವೇಶಗಳು ಬದುಕಿನ ಪಾಠ ಹೇಳಿವೆ, ಮನದ ಬೇಸರ ಓಡಿಸಿವೆ, ಕಣ್ಣಾಲಿಗಳಲ್ಲಿ ನೀರು ತರಿಸಿವೆ, ಇನ್ನು ಎಷ್ಟೋ ಸಾರಿ ಚಾದರ ಹೊದ್ದು ಮಲಗುವಂತೆ ಪ್ರೆರೇಪಿಸಿವೆ. ಕುರ್ಚಿಯಿಂದ ಕೆಳಕ್ಕೆ ಬೀಳುವಷ್ಟು ನಿದ್ರೆ ತರಿಸಿವೆ. ಇವುಗಳೆಲ್ಲಾ ಕಳೆದ 6 ವರ್ಷಗಳಲ್ಲಿ ನನಗಾದ ವಿ(ಚಿತ್ರ)ವಿಧ ಅನುಭವಗಳು.

ಹಲವು ಸಾರಿ ವೃತ್ತಿ ಏಕತಾನತೆ ತಂದೊಡ್ಡುವುದು ಸಾಮಾನ್ಯ. ಅದು ನನಗು ಆಗಾಗ ಕಾಡುತ್ತದೆ. ಆದರೆ ಅದೇ hangoverನಲ್ಲಿರುವಾಗ ನನಗೆ ಕೆಲವು ಧಾರಾವಾಹಿಗಳು ನೀಡುವ ಟಾನಿಕ್ ಮತ್ತಷ್ಟು ದಿನ ಕುದುರೆಯಂತೆ ಓಡಿಸಿಕೊಂಡು ಹೋಗುತ್ತವೆ. ಅಂತಹ ಒಂದು ಸನ್ನವೇಶ ನಿಮ್ಮ ಜೊತೆಗೆ ಹಂಚಿಕೊಳ್ಳುವ ಬಯಕೆಯಿಂದ ಅದನ್ನಿಲ್ಲಿ ದಾಖಲಿಸುತ್ತಿದ್ದೇನೆ. ಧಾರಾವಾಹಿಗಳೆಂದರೆ ಗ್ಲಿಸರಿನ್ ಹಚ್ಚಿಕೊಂಡು ಅಳುವ ಪಾತ್ರಧಾರಿಗಳು, ಸಣ್ಣದಕ್ಕು ತರಹೇವಾರಿ ರಿಯಾಕ್ಷನ್ ಕೊಡುವ ಪಾತ್ರಧಾರಿಗಳು ಎಂಬುದು ಹೆಚ್ಚಿನವರ ಅನಿಸಿಕೆ. ಆದರೆ ತುಂಬಾ ಸಾರಿ ಅಲ್ಲಿನ ವಿಷಯಗಳು ಕೃತ್ರಿಮ ಎಂದು ತಿಳಿದಿದ್ದರು ಅವುಗಳು ಹೊಮ್ಮಿಸುವ ಭಾವ ನಮ್ಮನ್ನು ಹಾಗೆ ಹಿಡಿದಿಡುತ್ತವೆ. ಅಂತಹ ಒಂದು ಸನ್ನಿವೇಶವನ್ನು ಕಟ್ಟಿಕೊಟ್ಟದ್ದು “ಮನೆಯೊಂದು ಮೂರು ಬಾಗಿಲು” ಧಾರಾವಾಹಿ.

ಕುಸಿಯುತ್ತಿರುವ ಸಂಬಂಧಗಳು, ಬದಲಾಗುತ್ತಿರುವ ಮಾನವೀಯ ಮೌಲ್ಯಗಳು, ಮಾಸುತ್ತಿರುವ ಹಳೆಯ ಸಂಪ್ರದಾಯಗಳು ಇವುಗಳನ್ನೆಲ್ಲಾ ವಿಜ್ರಂಭಿಸಿ ತೋರಿಸುವ ಧಾರಾವಾಹಿಗಳೆ ಇವೆಲ್ಲವುಗಳ ಪ್ರಾಮುಖ್ಯತೆಯನ್ನು ಎತ್ತಿ ಹಿಡಿಯುವುದು ಎಂದರೆ ನೀವು ನಂಬುತ್ತೀರಾ…? ಹೌದು ಆ ಒಂದು ಸನ್ನಿವೇಶ ಹೀಗಿದೆ ನೋಡಿ.ಒಬ್ಬ ಸಂಪ್ರದಾಯಸ್ಥ ತಾಯಿ, ಮಗ ತಪ್ಪು ದಾರಿ ಹಿಡಿದು, ಕಟ್ಟಿಕೊಂಡ ಅಮಾಯಕ  ಹೆಂಡತಿಗೆ ಡಿವೋರ್ಸ ಕೊಟ್ಟು ಬೇರೆ ಹೆಣ್ಣನ್ನು ಮದುವೆಯಾಗಲು ಪ್ರಯತ್ನಿಸುತ್ತಿರುವಾಗ ಅವನನ್ನು ಕರೆದುಕೊಂಡು ಬಂದು ಒಂದು ದೊಡ್ಡ ಅಗ್ನಿ ಪರೀಕ್ಷೆಗೆ ಒಡ್ಡುತ್ತಾಳೆ. ಅದೇನಪ್ಪ ಎಂಬುದೆ ಈ ದೃಶ್ಯದ ವೈಚಿತ್ರ್ಯ ಮತ್ತು ವಿಶೇಷ.

ಕಟ್ಟಿದ ತಾಳಿಯನ್ನು ಕತ್ತರಿಸುವುದು ಅಷ್ಟು ಸರಳವೇ!?

ಕಟ್ಟಿದ ತಾಳಿಯನ್ನು ಕತ್ತರಿಸುವುದು ಅಷ್ಟು ಸರಳವೇ!?

 ಆ ಅಗ್ನಿ ಪರೀಕ್ಷೆ ಏನಪ್ಪಾ ಅಂದರೆ ಮಗ ಶಾಸ್ತ್ರೋಕ್ತವಾಗಿ ಮದುವೆಯಾಗಿದ್ದಾನೆ. ಹಿಂದು ಧರ್ಮದ ಎಲ್ಲ ವಿಧಿ ವಿಧಾನಗಳನ್ನು ಪೂರೈಸಿ ಹುಡುಗಿಯ ಕತ್ತಿಗೆ ತಾಳಿ ಕಟ್ಟಿದ್ದಾನೆ. ಅದಕ್ಕೆ ಈಗ ಆ ಎಲ್ಲ ಸಂಪ್ರದಾಯಗಳನ್ನು ತಿರುಗಾ ಮುರಗಾ ಮಾಡಬೇಕು. ಧಾರ್ಮಿಕವಾಗಿ ಮದುವೆಯಾಗಿದ್ದೀಯಾ ಅದಕ್ಕೆ ಬಿಡುಗಡೆ ಕೂಡಾ ಧಾರ್ಮಿಕವಾಗಲಿ ಎಂಬುದು ಅವಳ ಶರತ್ತು. ಇದು ಮೇಲ್ನೋಟಕ್ಕೆ ನಾಟಕೀಯ ಹಾಗೂ ಹಾಸ್ಯಾಸ್ಪದ ಎಂಬಂತೆ ಕಾಣಿಸಬಹುದು. ಆದರೆ ಒಂದು ಕ್ಷಣ ಯೋಚಿಸಿ, ನಮ್ಮ ವಿಧಿ ವಿಧಾನಗಳಲ್ಲಿ ಇಲ್ಲದ ನಡಾವಳಿಯ ಮೂಲಕ ಮದುವೆಯನ್ನು ಕಡಿದು ಕೊಳ್ಳುವುದು ಎಷ್ಟು ಕಷ್ಟದ ಕೆಲಸ ಎಂದು. ಏಕೆಂದರೆ ಇಲ್ಲಿ ಹುಡುಗ ಸ್ವಲ್ಪ ಧೈರ್ಯ ಮಾಡಿ ಸಪ್ತಪದಿಯನ್ನು ಅಳುತ್ತಿರುವ ಹೆಂಡತಿಯೊಂದಿಗೆ ಉಲ್ಟಾ ತಿರುಗುತ್ತಾನೆ. ಆದರೆ ಸವಾಲು ಎದುರಾಗುವುದೆ ಆಗ. ತಾಯಿ ನೀನು ಕಟ್ಟಿರುವ ತಾಳಿಯನ್ನು ನಿನ್ನ ಕೈಯಾರೆ ನೀನೆ ಕತ್ತರಿಸು ಎಂದು ಹೇಳಿದಾಗ.

ಹೀಗೊಂದು ವಿಶಿಷ್ಟ ಡಿವೋರ್ಸ ಪದ್ಧತಿ

ಹೀಗೊಂದು ವಿಶಿಷ್ಟ ಡಿವೋರ್ಸ ಪದ್ಧತಿ

 ನಿಜಕ್ಕು ಎಷ್ಟೇ ಸಂಪ್ರದಾಯ ವಿರೋಧಿಗಳಾದರು ನಮ್ಮ ಆಚರಣೆಗಳು ನಮ್ಮನ್ನು ಕೆಲವೊಮ್ಮೆ ಭಾವನಾತ್ಮಕವಾಗಿ ಬಂಧಿಸಿ ಬಿಡುತ್ತವೆ. ಸರಾಗವಾಗಿ ಕಟ್ಟಿದ ತಾಳಿಯನ್ನ ಕೈಯಿಂದ ಕಿತ್ತೊಗೆಯುವದು ಎಂತಹವರಿಗಾದರು ಹಿಂಸೆಯ ಕೆಲಸವೇ. ಹೆಂಡತಿ ಎಂಬುವವಳು ತನ್ನ ಇತಿ ಮಿತಿಗಳನ್ನ ದಾಟಿದ್ದರೆ ರೋಸಿ ಹೋದ ಗಂಡಸು ತಾಳಿ ಕಿತ್ತೊಗೆಯಬಹುದು. ಆದರೆ ಅಮಾಯಕ ಹೆಂಡತಿಯ ಕೊರಳಲ್ಲಿರುವ ತಾಳಿಯನ್ನು ಅಷ್ಟೇ ಸರಳವಾಗಿ ಕತ್ತರಿಸುವುದು ಕಸಿವಿಸಿಯ ವಿಚಾರವೇ. ಇದು ಕಾನೂನಿಗೆ ವಿರುದ್ಧವಾದದ್ದಲ್ಲ. ಆದರೆ ಸಂಪ್ರದಾಯವಾಗಿ ಮದುವೆಯಾಗುವ ನಾವು ಡಿವೋರ್ಸ ವಿಚಾರ ಬಂದಾಗ ಕಾನೂನಿನ ಮೋರೆ ಹೋಗುತ್ತೇವೆ. ಏಕೆಂದರೆ ಅಲ್ಲು ಕೆಲವು ಧರ್ಮ ಸೂಕ್ಷ್ಮಗಳಿವೆ. ಅವುಗಳನ್ನು ಅದೇ ದಾರಿಯಲ್ಲಿಯೆ ಪರಿಹರಿಸಿ ಕೊಳ್ಳಬೇಕು. ಆದರೆ ಒಂದು ಸಾರಿ ಮದುವೆಯನ್ನ ಧಾರ್ಮಿಕವಾಗಿಯೆ ಧಿಕ್ಕರಿಸಬೇಕು, ಮುರಿದು ಹಾಕಬೇಕು ಎಂದಾಗಿದ್ದರೆ ಎಷ್ಟು ಮುಜುಗರಕ್ಕೆ ಒಳಪಡಬೇಕಿತ್ತಲ್ಲವೇ. ಇದನ್ನು ಹೇಳುವುದಕ್ಕೆ ಇಷ್ಟೇಲ್ಲ ಹೇಳಬೇಕಾಯಿತು. ತಲತಲಾಂತರದಿಂದ ಬಂದ ಸಂಪ್ರದಾಯಗಳು ನಮ್ಮ ನೈತಿಕತೆಯನ್ನು ಉಳಿಸಿ ಮಾನವೀಯ ಮೌಲ್ಯಗಳನ್ನು ಎತ್ತಿ ಹಿಡಿಯುತ್ತವೆ ಎಂಬುದು ಎಷ್ಟು ಸತ್ಯ ಅಲ್ಲವೇ!

ಅವನು ಹೆಂಡತಿ ಕತ್ತಿನ ತಾಳಿಯನ್ನು ಕಿತ್ತೆಸೆದನಾ, ಹಾಗಾದರೆ ಅಲ್ಲಿ ನಡೆದದ್ದಾದರು ಏನು ಎಂಬ ಕುತೂಹಲಕ್ಕೆ ಮೇ 19, ಮತ್ತು 20, 2011ರಂದು ಸಂಜೆ 7.00 ಕ್ಕೆ ಈ ಟೀವಿಯಲ್ಲಿ ಪ್ರಸಾರವಾಗುವ ಮನೆಯೊಂದು ಮೂರು ಬಾಗಿಲು ಧಾರಾವಾಹಿಯನ್ನು ವೀಕ್ಷಿಸಿ, ಹೇಗಿತ್ತು ಎಂದು ನನಗು ಹೇಳಿ.

 

ಟ್ಯಾಗ್ ಗಳು:

ವಿಶ್ವದ ಅಣ್ಣ ಹೊಡೆದುರುಳಿಸಿದ ಪಾತಕಿ ಬಿನ್ ಲಾಡೆನ್ ನ

” The cause of securing our country is not complete. But tonight, we are once again reminded that America can do whatever we set our mind to. That is the story of our history, whether it’s the pursuit of prosperity for our people, or the struggle for equality for all our citizens; our commitment to stand up for our values abroad, and our sacrifices to make the world a safer place”.

ಈ ಮೇಲಿನ ಸಾಲುಗಳು ವಿಶ್ವದ ಹಿರಿಯಣ್ಣ ಎಂದು ಬೀಗುವ ಅಮೆರಿಕಾ ಅಧ್ಯಕ್ಷ ಬರಾಕ ಓಬಮಾ ತನ್ನ ರಾಷ್ಟ್ರದ ಬಲಿಷ್ಠ  ಸೈನ್ಯ ಅಲ್ ಖೈದಾ ನಾಯಕ, ಉಗ್ರಗಾಮಿ ಒಸಮಾ ಬಿನ್ ಲಾಡೆನ್ ನ್ನು ಪಾಕಿಸ್ತಾನದ ಅಬ್ಬೊಟ್ಟಾಬಾದ್ ನಲ್ಲಿ ಗುಂಡಿಕ್ಕಿ ಕೊಂದ ನಂತರ ಸಂಭ್ರಮದಿಂದ ರಾಷ್ಟ್ರವನ್ನುದ್ದೇಶಿಸಿ ಮಾಡಿದ ಭಾಷಣದಲ್ಲಿ (http://www.youtube.com/watch?v=ZNYmK19-d0U&feature=featured) ಹೇಳಿದ್ದು.

ಸುಮಾರು ಹತ್ತು ವರ್ಷಗಳಿಂದ ಜಾತಕ ಪಕ್ಷಿಯಂತೆ ಕಾದು ಕುಳಿತ ಅಮೆರಿಕಾ ಸೈನ್ಯ ನಿರ್ದಿಷ್ಟ ಮಾಹಿತಿ ಆಧರಿಸಿ ರಾಷ್ಟ್ರಧ್ಯಕ್ಷರ ಅಣತಿಯಂತೆ ನಡೆಸಿದ ಕಾರ್ಯಾಚರಣೆಯಲ್ಲಿ ವಿಶ್ವಕ್ಕೆ ಮೋಸ್ಟ ವಾಂಟೆಡ್ ಆಗಿದ್ದ ಲಾಡೆನ್ನನ್ನ ಹೊಸಕಿ ಹಾಕುವಲ್ಲಿ ಯಶಸ್ವಿಯಾಗಿದೆ. ಈ ಮೂಲಕ 09/11 ನ ಘೋರ ದುರಂತಕ್ಕೆ ಅಮೆರಿಕಾ ಸೇಡು ತೀರಿಸಿಕೊಂಡಂತಾಗಿದೆ. ಆದರೆ ಅಲ್ಲಿನ ಅಧ್ಯಕ್ಷರು ಹೇಳುವಂತೆ ಕಳೆದು ಹೋದ ಜೀವಗಳನ್ನು ಮರಳಿ ಪಡೆಯಲು ಆಗದಿದ್ದರು, ಸತ್ಯ ಮತ್ತು ಹೋರಾಟಕ್ಕೆ ಯಶ ಸಿಕ್ಕಂತಾಗಿದೆ.

ಇದಕ್ಕಿಂತ ಒಳ್ಳೆಯ ಸಾವು ದೊರಕುವುದಕ್ಕಾದರು ಹೇಗೆ ಸಾಧ್ಯ!!!

ಇದಕ್ಕಿಂತ ಒಳ್ಳೆಯ ಸಾವು ದೊರಕುವುದಕ್ಕಾದರು ಹೇಗೆ ಸಾಧ್ಯ!!!

 ಲಾಡೆನ್ ಇಂದು ಜಗತ್ತಿನ ಪಾಲಿಗೆ ದೊಡ್ಡ ವಿಲನ್ ಆಗಿ ಕಾಡಿದ್ದ. ಅಲ್ ಖೈದಾ ಎಂಬ ದುಷ್ಟರ ಗುಂಪಿನ ನಾಯಕನಾಗಿ ಮಾಡಿದ ಅನಾಹುತಕ್ಕೆ ತೆತ್ತ ಬೆಲೆಯಿದು. ಇಡೀ ವಿಶ್ವವನ್ನ ಮುಸ್ಲಿಂ ರಾಷ್ಟ್ರವಾಗಿ ಮಾಡುವ ದುರುದ್ದೇಶದ ಒಬ್ಬ ಧರ್ಮಾಂಧ ಮಾಡಿದ ಅನಾಹುತಕ್ಕೆ ಬಲಿಯಾದ ಜೀವಿಗಳ ಸಂಖ್ಯೆ ಸಾವಿರಾರು. ಇಲ್ಲಿ ನಿಜಕ್ಕೂ ಅಮೆರಿಕಾದ ಕಾಳಜಿ ಮತ್ತು ಭದ್ರತೆಗೆ ಕೊಡುವ ಆದ್ಯತೆ ಮೆಚ್ಚುವಂತಹದ್ದೆ.ಅಮೆರಿಕಾ ರೂಪಿಸಿದ  ಈ ಕಾರ್ಯಾಚರಣೆ ಇವತ್ತು ನಿನ್ನೆಯದಲ್ಲ. ಕಳೆದ ವರ್ಷ ಫೆಬ್ರವರಿಯಿಂದ ವಿಷಯ ಕಲೆ ಹಾಕುತ್ತಾ, ಆಗಸ್ಟನಲ್ಲಿ ಖಚಿತ ಮಾಹಿತಿ ದೊರೆತು ಅಂದಿನಿಂದ ಲಾಡೆನ್ ನ ಮುಗಿಸಲು ರಣತಂತ್ರ ರೂಪಿಸಲಾಗುತ್ತಿತ್ತಂತೆ. ಇದು ಅಂದು ಕೊಂಡಷ್ಟು ಸುಲಭದ ಕೆಲಸವಾಗಿರಲಿಲ್ಲ. ಲಾಡೆನ್ ತುಂಬಾ ಚಾಣಾಕ್ಷ. ಉಗ್ರರ ತಾಣ ಪಾಕಿಸ್ತಾನ  ಎಂಬುದು ಎಲ್ಲರಿಗೆ ಗೊತ್ತಿರುವಂತೆ ಲಾಡೆನ್ ಅದನ್ನು ತನ್ನ ಅಡುಗುದಾಣದಂತೆ ಬಳಸಿದ್ದಾನೆ. ಇದರ ಸುಳಿವು ಅಮೆರಿಕಾದ ಗುಪ್ತಚರ  ಇಲಾಖೆಗೆ ತಿಳಿಯದೆ ಇರಲಿಲ್ಲ. ತುಂಬಾ ಪೂರ್ವ ತಯಾರಿ ಮಾಡಿಕೊಂಡು ದಾಳಿ ನಡೆಸಿದ ಸೈನ್ಯಕ್ಕೆ ಲಾಡೆನ್ ಹೊಸಕಿ ಹಾಕುವುದು ಸರಳವಾಯಿತೆಂದೆ ಹೇಳಬಹುದು.ತನ್ನ ರಾಷ್ಟ್ರದ ಜನತೆಗೆ ಅನ್ಯಾಯವೆಸಗಿದ ಲಾಡೆನ್ ನ್ನು ಮುಗಿಸುವದರೊಂದಿಗೆ ಅಮೆರಿಕಾ ವಿಶ್ವಕ್ಕೆ ತನ್ನ ವಿರುದ್ಧ ತಿರುಗಿ ಬಿದ್ದವರು ತಕ್ಕ ಬೆಲೆ ತೆರಬೇಕಾಗುತ್ತದೆ ಎಂಬುದರ ಸ್ಪಷ್ಟ ಸಂದೇಶ ನೀಡಿದೆ ಎಂಬುದು ಖಾತ್ರಿಯಾಗುತ್ತದೆ.

ನಿಜಕ್ಕೂ ಎಲ್ಲರು ಓಬಮಾ ಕಾರ್ಯಾಚರಣೆ ನಂತರ ಮಾಡಿದ ಭಾಷಣ (ಮೇಲೆ ಕೊಟ್ಟ ಲಿಂಕ್ ಬಳಸಿ) ಕೇಳಲೆಬೇಕು. ಒಬ್ಬ ರಾಷ್ಟ್ರ ನಾಯಕ ತನ್ನ ಜನರ  ಸುರಕ್ಷತೆಗೆ ಅದೆಷ್ಟು ಪ್ರಾಧಾನ್ಯತೆ ನೀಡುತ್ತಾನೆ. ಅವರ ನೋವಿಗೆ ಹೇಗೆ ಸ್ಪಂದಿಸುತ್ತಾನೆ.ದೇಶದ ಹಿತ ಕಾಪಾಡುವುದು ಅವನ ಪ್ರಥಮ  ಆದ್ಯತೆ ಎಂಬುದನ್ನು ಹೇಗೆ ಸಾಧ್ಯ ಮಾಡಿ ತೋರಿಸುತ್ತಾನೆ ಎಂಬುದು ವೇದ್ಯವಾಗುತ್ತದೆ.ಈಗ ತಾನೇ NDTVಯಲ್ಲಿ ಬರ್ಖಾ ಲಂಡನ್ ನಲ್ಲಿರುವ ಪಾಕಿಸ್ತಾನದ ರಾಯಭಾರಿ ವಾಜಿದ್ ಅವರನ್ನು ನಿಮಗೆ ಈ ಕರ್ಯಾಚರಣೆ ಬಗ್ಗೆ ತಿಳಿದಿತ್ತೆ ಎಂದು ಕೇಳಿದರೆ, ನಮ್ಮ ಸಹಾಯವಿಲ್ಲದೆ ಇದು ಸಾಧ್ಯವಾಗುತ್ತಿತ್ತಾದರು ಹೇಗೆ ಎಂದು ಪ್ರಶ್ನೆ ಹಾಕಿ ಹುಳುಕು ಮುಚ್ಚಿ ಕೊಳ್ಳಲು ಹವಣಿಸುವಂತಿತ್ತು. ಈ ಕಾರ್ಯಚರಣೆ ನೀವೇಕೆ ಮಾಡಲಿಲ್ಲ ಎಂದಾಗ ಇದು ಅಮೆರಿಕಾದ ಪ್ರಾಧಾನ್ಯತೆಯಾಗಿತ್ತು ಎಂದು ಹೇಳಿ ಕೈ ತೊಳೆದುಕೊಂಡರು. ಪಾಕಿಸ್ತಾನದ ಮಿಲಿಟರಿ ಅಕಾಡೆಮಿಯಿಂದ ಕೇವಲ 1ಕೀಮೀ ದೂರದಲ್ಲಿ ಅಡಗಿಕೊಂಡದ್ದು ತನಗೆ ಗೊತ್ತೇ ಇರಲಿಲ್ಲ ಎಂದು ಹೇಳಿದರು ನಂಬುವುದಾದರು ಹೇಗೆ ಸಾಧ್ಯ ಅಲ್ಲವಾ!

ಅದೇ ಎನೇ ಇರಲಿ ಅಮೆರಿಕಾ ಮಿಲಿಟರಿ ಲಾಡೆನ್ ನ ಶವದ ಚಿತ್ರವನ್ನ ಬಿಡುಗಡೆ ಮಾಡಿದೆ. ಆದಾಗ್ಯೂ  ಡಿಎನ್ ಎ ಪರೀಕ್ಷೆ ನಂತರವೇ ಅದು ಲಾಡೆನ್ ಎಂದು ಖಚಿತವಾಗಿ ಬಾಯಿ ಬಿಟ್ಟಿದೆ.  ಈಗ  ಎಲ್ಲೆಡೆ ಈ ಕಾರ್ಯಾಚರಣೆ ನಡೆದದ್ದಾದರು ಹೇಗೆ?  ನಿಜಕ್ಕೂ ಪಾಕ್ ಇದಕ್ಕೆ ಸಹಕಾರ ನೀಡಿತ್ತಾ? ಈ ಮಾಹಿತಿ ಅದಕ್ಕೂ ಇತ್ತಾ? ಹೀಗೆ ಇನ್ನೂ ನೂರೆಂಟು ಪ್ರಶ್ನೆಗಳು ಉದ್ಭವಿಸುತ್ತಲೆ ಇವೆ. ಅಮೆರಿಕಾ ಈ ವಿಷಯದಲ್ಲಿ ಹೆಚ್ಚೇನು ಬಾಯಿ ಬಿಡದಿರುವುದು ಎಲ್ಲ ಪ್ರಶ್ನೆಗಳಿಗೆ ಎಡೆ ಮಾಡಿ ಕೊಡುತ್ತಿದೆ ಎಂದೇ ಹೇಳಬಹುದು.  ಈಗ ಬರೀ ಊಹಾಪೋಹಗಳದ್ದೆ ಸಂತೆ. ಇಷ್ಟೇಲ್ಲಾ ನಡೆದರು ಪಾಕಿಸ್ತಾನ  ಏನನ್ನು ಬಾಯಿ ಬಿಡದಿರುವುದನ್ನು ನೋಡಿದರೆ ಕಳ್ಳನ ಮನಸ್ಸು ಹುಳ್ಳ ಹುಳ್ಳಗೆ ಎಂಬಂತಿದೆ. ಈ ನಿಟ್ಟಿನಲ್ಲಿ ಅದೆಷ್ಟೋ ಸತ್ಯಗಳಿಗೆ ಮಾತು ಬರಬೇಕಿದೆ. ಎಲ್ಲ ಮಾಧ್ಯಮಗಳು ಇದರ ಹಿಂದಿನ ಸಂದೇಹಗಳನ್ನು ಬೆನ್ನಟ್ಟಿವೆ. ಸತ್ಯ ಅದ್ಯಾರ ಬಾಯಲ್ಲಿ ಅಡಗಿ ಕುಳಿತಿದೆಯೋ ಕಾಲವೇ ಉತ್ತರಿಸಬೇಕು. ಆದರೆ ಒಂದು ವಿಷ ಜಂತು ಸರ್ವನಾಶವಾದದ್ದು ಮಾತ್ರ ಭಯೋತ್ಪಾದನೆಯ ವಿನಾಶದತ್ತ ದಿಟ್ಟ ಹೆಜ್ಜೆ ಎಂದು  ಹೇಳಬಹುದು.

ಇದೆಲ್ಲ ನೋಡಿದ ಮೇಲೆ ಒಂದು ಸಂದೇಹ ಕಾಡದಿರದು.ಅದೇನೆಂದರೆ ಅಮೆರಿಕಾ ತನ್ನ ಶತೃಗಳಿಗೆ ಸ್ಪಷ್ಟ ಸಂದೇಶ ರವಾನಿಸಿ ಅದನ್ನು ತಡವಿಕೊಳ್ಳುವವರ ಪರಿಣಾಮ  ಏನಾಗಬಹುದು ಎಂಬುದನ್ನು ಸಾಧ್ಯ ಮಾಡಿ ತೋರಿಸಿದೆ. ಆದರೆ ನಮ್ಮ ದೇಶದಲ್ಲಾದ ಅದೆಷ್ಟೋ ಉಗ್ರರ ದಾಳಿಗೆ ನಾವು ಇಟ್ಟ ಹೆಜ್ಜೆಗಳೇನು. ಅದರತ್ತ ಕಂಡ ಜಯದ ಪ್ರಮಾಣವಾದರು ಏನು ಎಂದು ಕೆದಕಿ ನೋಡಿ ಉತ್ತರಗಳೆಲ್ಲಾ ಹಾಳೆಯ ಮೇಲೆ. ಕಾರ್ಯರೂಪಕ್ಕೆ ಬಂದ ಉದಾಹರಣೆಗಳಿಲ್ಲ. ಒಬ್ಬ ಕಸಬ್ ನ ಗಲ್ಲಿಗೇರಿಸಲು ನಮ್ಮ ಕಾರ್ಯಾಂಗ ಮತ್ತು ನ್ಯಾಯಾಂಗ  ಇನ್ನು ಮೀನಾಮೇಷ  ಎಣಿಸುತ್ತಲೆ ಇವೆ. ಕಸಬ್ ಒಬ್ಬ ಸಾಧಾರಣ ಭಯೋತ್ಪಾದಕ. ಯಾರದೋ ಅಣತಿಯಂತೆ ನಡೆದುಕೊಂಡ ಮುಠ್ಠಾಳ. ಆದರೆ ಇಂತಹ ಮುಠ್ಠಾಳರ ನಾಯಕನನ್ನ ಹೊಡೆದುರಳಿಸಿದ ಅಮೆರಿಕಾ ಇಂತಹ ವಿಷಯಗಳಲ್ಲಿ ಅನುಸರಿಸಬೇಕಾದ ನಡೆಯನ್ನು ಸ್ಪಷ್ವವಾಗಿ ತೋರಿಸಿ ಕೊಟ್ಟಿದೆ. ನಮ್ಮ ಘನ ಪ್ರಧಾನಿ ಮತ್ತು ಗೃಹ ಸಚಿವರ ಹೇಳಿಕೆಗಳನ್ನ ಗಮನಿಸಿ. ಕೈಲಾಗದ ನಾಯಕರ ಅಣಿ ಮತ್ತುಗಳು ಹೇಗೆ ಉದುರುತ್ತಿವೆ. ಇವರು ದಾವುದ್ ನನ್ನು ಮುಗಿಸಲು ಅಮೆರಿಕಾಕ್ಕೆ ಗುತ್ತಿಗೆ ಕೊಡುತ್ತಿದ್ದಾರೆ. ಅದರರ್ಥ ನಮ್ಮ ಕೈಯಲ್ಲಿ ಆಗುವುದಿಲ್ಲ  ಎಂದೇ ಅಲ್ಲವೇ! ಭಯೋತ್ಪಾದನೆಯ ನಿಟ್ಟಿನಲ್ಲಿ ನಿಮ್ಮ ದಿಟ್ಟ ಹೆಜ್ಜೆಗಳೇನು ಮೊದಲು ಅದನ್ನ ಕಾರ್ಯ ರೂಪಕ್ಕೆ ತರಬೇಕಲ್ಲವೇ. ಒಬ್ಬ ಕಸಬ್ ನನ್ನು ಹಣಿದು ಮುಗಿಸಲಾಗದ  ಇವರಿಂದ  ಒಬಮಾ ತರಹದ ನಾಯಕತ್ವವನ್ನ ನಿರೀಕ್ಷಿಸಲಾದರು ಸಾಧ್ಯವೇ! ತನ್ನ ಜನತೆಯ ರಕ್ಷಣೆಗೆ ಟೊಂಕ ಕಟ್ಟಿ ನಿಂತು ಆ ನಿಟ್ಟಿನಲ್ಲಿ ಯಶಸ್ವೀಯಾಗಿ ಬೀಗುತ್ತಿರುವ  ಒಬಮಾ ತಮ್ಮ ಭಾಷಣದಲ್ಲಿ ಇದರಿಂದ ರಾಷ್ಟ್ರದ ಜನತೆ ಪೂರ್ಣ ಸುರಕ್ಷಿತ  ಎಂದು ಹೇಳುವುದು ಸಾಧ್ಯವಿಲ್ಲ  ಎಂಬ ಮಾತುಗಳನ್ನಾಡಿದ್ದಾರೆ. ಇಂತಹ ನಿಲುವು ಮತ್ತು ಪ್ರಾಮಾಣಿಕತೆ ನಮ್ಮ ನಾಯಕರಲ್ಲಿ ಮೂಡುವುದೇ ಇಲ್ಲಾ. ಎಂತಹ ದುರಾದೃಷ್ಟ ಅಲ್ಲವೇ….!!!!

ಓಬಮಾ ಭಾಷಣದ ಕೆಲವು ಸಾಲುಗಳನ್ನು ನಿಮ್ಮ ಅವಗಾಹನೆಗಾಗಿ ನೀಡುತ್ತಿದ್ದೇನೆ. ಈ ಸಾಲುಗಳ ಮೂಲಕ ಅಮೆರಿಕಾ ಹೇಗೆ ಎದೆಯುಬ್ಬಿಸಿ ನಿಲ್ಲುತ್ತೆ ಎಂದು ನೀವೂ ಕೂಡಾ ಮನಗಾಣಬಹುದು : And tonight, let us think back to the sense of unity that prevailed on 9/11. I know that it has, at times, frayed. Yet today’s achievement is a testament to the greatness of our country and the determination of the American people.

ಕೃತಜ್ಞತೆ : ಓಬಮಾ ಭಾಷಣದ ಪೂರ್ಣಪಾಠ “ಸಂಪಾದಕೀಯ”  http://sampadakeeya.blogspot.com/2011/05/blog-post_02.html  ಬ್ಲಾಗ್ ನಲ್ಲಿ ಪ್ರಕಟಗೊಂಡಿದೆ.ಅಲ್ಲಿಂದ ಕೆಲವು ಸಾಲುಗಳನ್ನು ಇಲ್ಲಿ ಬಳಸಿಕೊಂಡಿದ್ದಕ್ಕೆ ಸಂಪಾದಕೀಯ ಬಳಗಕ್ಕೆ ಕೃತಜ್ಞತೆಗಳು.

 

ಟ್ಯಾಗ್ ಗಳು:

ಅಂದು ಭೋರ್ಗರೆದ ತುಂಗೆ:ಇಂದು ಸದ್ದಿಲ್ಲದೆ ಸರಿದು ಹೋಗುತ್ತಿದ್ದಳು ತಣ್ಣಗೆ…

ನಿಮಗೆ ಈ ಸಂಗತಿ ಖಂಡಿತಾ ಮರೆಯಲು ಸಾಧ್ಯವಿಲ್ಲ. ಕಷ್ಟದಲ್ಲಿರುವವರ ಕಲ್ಪತರು ಶ್ರೀ ರಾಘವೇಂದ್ರ ಸ್ವಾಮಿಗಳು ನೆಲೆಸಿರುವ ಮಂತ್ರಾಲಯ ತುಂಗೆಯ ಮುನಿಸಿಗೆ ಬಲಿಯಾಗಿ ಭಾಗಶಃ ನೀರಿನಲ್ಲಿ ಮುಳುಗಿ ಹೋಗಿತ್ತು. ನೂರಾರು ಭಕ್ತರು ಜಲಪ್ರಳಯಕ್ಕೆ ಸಿಲುಕಿ ಜೀವ ಉಳಿಸಿ ಕೊಳ್ಳಲು ಎಲ್ಲೆಲ್ಲೋ ಏರಿ ಕುಳಿತಿದ್ದರು. ಸ್ವತಃ ಸುಶಮಿಂದ್ರ ತೀರ್ಥರು ಈ  ನೆರೆ ಹಾವಳಿಗೆ ಸಿಕ್ಕಿಕೊಂಡಾಗ ಕರ್ನಾಟಕದಿಂದ ಶೋಭಾ ಕರಂದ್ಲಾಜೆ ಹೆಲಿಕಾಪ್ಟರ್ ಮೂಲಕ ಬಂದು ಸ್ವಾಮಿಜಿಗಳನ್ನು ಮತ್ತು ಅವರ ಜೊತೆಗಿನ ರಾಮದೇವರನ್ನು ಸುರಕ್ಷಿತವಾಗಿ ಕರೆದು ಕೊಂಡು ಹೋಗಿದ್ದರು.

ಇದೆಲ್ಲ ಮತ್ತೆ ನೆನಪಿಸಿ ಕೊಳ್ಳಲು ಕಾರಣ ಕಳೆದ ವಾರ ಕುಟುಂಬದೊಂದಿಗೆ ಮಂತ್ರಾಲಯಕ್ಕೆ ತೆರಳಿದ್ದೆ. ಖಂಡಿತಾ ನನಗೆ ಇದೇ ಕ್ಷೇತ್ರವಾ ಸಂಕಟದ ದ್ವಾರ ಬಾಗಿಲಿಗೆ ಬಂದು ನಿಂತದ್ದು ಎಂಬ ಪ್ರಶ್ನೆ ಧೂತ್ತನೆ ಎದ್ದು ಕುಳಿತಿತು. ಅಂದಿನ ಆರ್ಭಟದಿಂದ ನಲುಗಿದ್ದ ಮಂತ್ರಾಲಯ ನನ್ನ ಕಣ್ಣಿಗೆ ಮಿರಿ ಮಿರಿ ಮಿರುಗುವಂತೆ ಕಾಣುತ್ತಿತ್ತು . ಗುರು ರಾಯರ ದರ್ಶನವು ಸಾಂಗವಾಗಿ, ಸಾಮಿಪ್ಯದಿಂದ ನೇರವೇರಿತು. ಒಂದು ದಿನ ಅಲ್ಲೇ ಉಳಿದುಕೊಂಡು ಮರುದಿನ ಬೆಳ್ಳಂಬೆಳಗ್ಗೆ ನದಿ ತೀರಕ್ಕೆ ಹೋದೆ. ಅಬ್ಬಾ! ನನ್ನ ಕಣ್ಣನ್ನ ನಾನೇ ನಂಬಲಾಗಲಿಲ್ಲ. ಅಂದು ಅಬ್ಬರಿಸಿದ್ದು ಇದೇ ತುಂಗೆಯೇ ಎಂಬ ಅನುಮಾನ ಕಾಡಲಾರಂಭಿಸಿತು. ಕಾರಣ ನನಗೆ ತುಂಗೆ ಹರಿಯುವದಿರಲಿ, ಕೊಂಚ ಸರಿದಾಡಿದಂತೆಯೇ ಕಾಣಿಸಲಿಲ್ಲ. ಎಂಥ ವಿಚಿತ್ರ ಅಲ್ಲವೇ!!!

ಆದರೆ ಅದೆಲ್ಲಕ್ಕಿಂತ ಗಾಢವಾಗಿ ನನ್ನನ್ನು ಕಾಡಿದ್ದು ಅಲ್ಲಿನ ಸ್ವಚ್ಛತೆಯದ್ದು. ನಮ್ಮ ರಾಷ್ಟ್ರದಲ್ಲಿರುವ  ಎಲ್ಲ ಪುಣ್ಯಕ್ಷೇತ್ರಗಳಲ್ಲಿನ ನದಿಯ ಬಳಿ ಸುಳಿಯಲು ಧೈರ್ಯ ಮಾಡಬೇಕು. ಭಯ ನೀರಿನ ಸೆಳೆತದ್ದಲ್ಲ. ಜನರ ಅಜ್ಞಾನ ಮತ್ತು ಬೇಜವಾಬ್ದಾರಿತನದ್ದು. ಧಾರ್ಮಿಕ ಕ್ಷೇತ್ರಗಳಲ್ಲಿ ಪ್ರವಾಸಿಗರ ಕೊಡುಗೆ “ಅಪಾರ”! ಅವರ ದೈಹಿಕ ಕೊಳೆಯಲ್ಲ ಅಲ್ಲೇ ವಿಸರ್ಜಿಸಿದ್ದರ ಫಲವಾಗಿ  ಸೂಕ್ಷ್ಮ ಮತಿಗಳ ಮನದಲ್ಲಿ ಹೇಸಿಗೆ ಹುಟ್ಟಿಸುತ್ತದೆ. ಇಂತಹ ಸ್ಥಿತಿಯಲ್ಲಿ ಪಾವಿತ್ರ್ಯದ ಮನಸ್ಥಿತಿಯಾದರು ಹುಟ್ಟಲು ಹೇಗೆ ಸಾಧ್ಯ ಅಲ್ಲವಾ!!!

ಬಂಡೆಯ ಅಡಿಯಲ್ಲಿ ಸರಿಯುತಿಹ ತುಂಗಮ್ಮ

ಬಂಡೆಯ ಅಡಿಯಲ್ಲಿ ಸರಿಯುತಿಹ ತುಂಗಮ್ಮ

ತುಂಗೆ ತನ್ನನ್ನು ತಾನು ಶುಚಿಗೊಳಿಸಿಕೊಳ್ಳಲು ಮತ್ತೊಮ್ಮೆ ಭೊರ್ಗರೆಯದೆ ಬೇರೆ ದಾರಿಯಿಲ್ಲ.ಈ ಪರಿ ಕಿರಿಕಿರಿಯಿಂದಲೇ ಇರಬೇಕು ಅವಳು ಮುನಿಸಿಕೊಂಡು ಅಬ್ಬರಿಸಿದ್ದು. ಇಷ್ಟೆಲ್ಲ ಆದರು ನಮ್ಮ ಜನಗಳು ಎಚ್ಚೆತ್ತುಕೊಂಡಿಲ್ಲ.ಕ್ಷೇತ್ರದ ಪಾವಿತ್ರ್ಯತೆ ನದಿ ತೀರದಲಿ ಯಾಕೆ ಜಾಗೃತವಾಗುವುದಿಲ್ಲವೋ ಆ ಭಗವಂತನೇ ಉತ್ತರಿಸಬೇಕು….!!!!

ಮೇಲೆ ಸುಂದರ ಬೆಳಗು, ಅದರಡಿ ತುಂಗೆ ಬರಡು...

ಮೇಲೆ ಸುಂದರ ಬೆಳಗು, ಅದರಡಿ ತುಂಗೆ ಬರಡು...

 

ಟ್ಯಾಗ್ ಗಳು: ,

ಬದುಕೆಂಬ ಟೆಂಟ್ ಥಿಯೇಟರ್ ನಲ್ಲಿ ನೂರೆಂಟು ಸಿನಿಮಾಗಳು

ನಿಜ! ಜೀವನದುದ್ದಕ್ಕು ಬದುಕಿನಲ್ಲಿ ಸರಣಿಯಾಗಿ ನಡೆಯುವ ಘಟನೆಗಳೆಲ್ಲ ಒಂದು ಸುಂದರ ಸಿನಿಮಾದಂತೆ. ಸಂತೋಷವಿದೆ, ಸಾಹಸವಿದೆ. ಕಷ್ಟಗಳಿವೆ, ಅವುಗಳಿಗೆ  ನೂರೆಂಟು ತಿರುವುಗಳಿವೆ. ಈ ಜೀವನದ ಜಾತ್ರೆ ಮುಗಿದಾಗಲೇ ಶುಭಂ ಹೇಳುವುದು.

ನನಗೊಬ್ಬನಿಗೆ ಅಲ್ಲ ಎಲ್ಲರಿಗೂ ಅವರ ಬಾಲ್ಯ ರಸಪೂರಿ ಮಾವಿನ ಹಣ್ಣಿನಷ್ಟೆ ಅಪ್ಯಾಯಮಾನ. ಆಗ ಎಷ್ಟೋ ಸಾರಿ ಬೇಗ ದೊಡ್ಡವರಾಗ ಬೇಕು, ಅವರಂತೆ ಪ್ಯಾಂಟ್ ಹಾಕಬೇಕು, ಮೀಸೆ ಬಿಡಬೇಕು, ರಾಜಾ ರೋಷವಾಗಿ ತಿರುಗಾಡ ಬೇಕು ಎಂಬ ಹುಚ್ಚು ಕನಸಿನ ಕುದುರಿ ಓಡುತ್ತಲೆ ಇರುತ್ತದೆ. ಆದರೆ ಒಂದು ಸಾರಿ ದೊಡ್ಡವರಾಗಿ ನೋಡಿ ಆಮೇಲೆ ಈ ಜಂಜಡಗಳ ಸಹವಾಸವೇ ಬೇಡ. ಬದುಕು ಒಂದು ಸಾರಿ REWIND ಆದರೆ ಎಷ್ಟು ಚೆನ್ನ ಅಲ್ಲವಾ ಎಂದೆನಿಸದೇ ಇರದು. ಅದು ಬಾಲ್ಯಕ್ಕಿರುವ ಮುಗ್ಧತೆ.

ಸಿಟಿಯೊಳಗ ಬೆಳದ ಹುಡುಗ್ರಿಗೆ ಇದೆಲ್ಲಾ ಅನುಭವ ಆಗಿರಂಗಿಲ್ಲ. ಅದಕ ನಾನು ಸಣ್ಣವಿದ್ದಾಗ ನಮ್ಮೂರ ಹೆಂಗಿತ್ತ ಅಂತ ಸುಮ್ಮನೆ ಒಂದು ಸಲ ನೆನಪು ಮಾಡಿಕೊಂಡು ಅದರ ಸವಿ ಸವಿಯೋಣ ಅಂತ ಇಲ್ಲಿ ಬರೀಲಿಕತೀನಿ. ಒಂದಷ್ಟು ತುಂಟಾಟ, ಮತ್ತಷ್ಟು ಕಿತ್ತಾಟ, ಮೊಗದಷ್ಟು ಹುಡುಗಾಟ ಅಂದ್ರನ ಬಾಲ್ಯ ನೋಡ್ರೀ. ಅದಕ ನಾವು ಎಷ್ಟು ಎತ್ರಕ್ಕ ಹೋದ್ರು ಹಳೀ ನೆನಪು ಮರೆಯಂಗಿಲ್ಲ. ಅದರಾಗ ನನಗ ನನ್ನ ಹಳಿ ನೆನಪು ಮಾಡಿಕೊಳ್ಳದಂದ್ರನ ಹೋಳಿಗಿ ಊಟ ಮಾಡಿದಂಗ. ಆ ಬುಟ್ಟಿಯಾಗಿನ ಒಂದು ನೆನಪು ಅಂದ್ರ ನಮ್ಮ ಕಿನ್ನಾಳಾಗಿನ ಸಿನಿಮಾ ಟಾಕೀಸ್.

ಈಗೇನ ಬಿಡ್ರಿ PVR, I-MAX ಅಂತ ಏನೇನೋ ಥೇಟರ  ಬಂದಾವ. ಓಳಗ ಹೋದ್ರ ಭಾರೀ ಇಂದ್ರನ ಆಸ್ಥಾನದಾಗಿನ ಸಿಂಹಾಸನ ಇದ್ದಾಂಗ ಇರ್ತಾವ. ತಣ್ಣಗ ಎಸಿ, ಸುತ್ತರೆ ಮ್ಯೂಸಿಕ್ ಕೇಳಿಸ್ತಿರ್ತದ. ಸೀಟಿಗೆನ ಬಾಟಲಿ (ಕೂಲ್ಡ್ರೀಂಕ್ಸ) ಇಟುಗೊಳ್ಳಕ ಒಂದು ಸಣ್ಣ ತೂತ ಇರ್ತದ. ಹಾಯ್ ಅಂತ ಸಿನಿಮಾ ನೋಡಿ ಬರಬಹುದು. ಆದ್ರ  ಕಿಸೇದಾಗಿನ ರೊಕ್ಕ ಸೈತ ಹಂಗ ಹಾಯ್ ಅಂತ ಖರ್ಚಾಗಿರ್ತದ ಆ ಮಾತ ಬ್ಯಾರೇ. ಏನಪ ಅಂದ್ರ ಐಷಾರಾಮಿಯಾಗಿ ಸಿನಿಮಾ ನೋಡಿ ಬರಬಹುದು. ಅಷ್ಟ ಆರಾಮು. ಆದ್ರ ನಾನು ಹೇಳಕ್ಕ ಹೊಂಟಿದ್ದು ಇದಕ ವಿರುದ್ಧ ಇರೋ ಅನುಭವ. ನಮ್ಮೂರಾಗ ಟಾಕೀಸ ಹೆಂಗಿತ್ತಪ ಅಂದ್ರ ಅದರ ಮಜಾನ ಬ್ಯಾರೆ.

ಯಾವಾಗ ನಾನು ಒಂಚೂರು ದೊಡ್ಡವನಾದೆ ಆಗಿನಿಂದ ಸೆಕೆಂಡ್ ಷೋ ಸಿನಿಮಾಕ ಹೋಗ್ತಿದ್ದೆ. ಅದಕು ಮುಂಚೆ ನಮ್ಮದೇನಿದ್ರು ಮೊದಲೇ ಆಟಾನ. ಆಗ ಈಗಿನಂಗ ಸಿಲ್ವರ್ ಕ್ಲಾಸ್, ಗೋಲ್ಡ ಕ್ಲಾಸ್, ಬಾಲ್ಕನಿ ಅಂತೆಲ್ಲ ಇರಲಿಲ್ಲ. ಆದ್ರ ನಮ್ಮ ಕಿನ್ನಾಳಾಗ ಬಾಲ್ಕನಿ ಇತ್ತು. ಅದು ಬರೀ ಹೆಂಗಸರಿಗೆ ಮೀಸಲು. ಗಂಡಸರ ಹಿಂದ ಹೆಂಗಸರ ಸೆಪರೇಟ್ ಆಗಿ ಕುತ್ಗೊಬೇಕು. ದೊಡ್ಡ ಮನಿ ಹೆಣ್ಮಕ್ಕಳು ಬಂದ್ರು ಅಷ್ಟ. ಅವರಿಗೆ ಮ್ಯಾಲೇನ ಚೇರ್ ಹಾಕಿ ಕೂಡ್ಸೊರು. ನಾವಿದ್ದವಲ ನಮ್ಮದೇನಿದ್ರು ಗಾಂಧೀ ಕ್ಲಾಸರೀ. ಶಿವಾ ಅಂತ ಕಾಲ ಚಾಚಿಕೊಂಡು ಪಿಚ್ಚರ ನೋಡದ್ರಾಗಿನ ಮಜಾ ಅವನವ್ವನ ಈಗಿನ ಮಲ್ಟಿಪ್ಲೆಕ್ಸನಾಗು ಸಿಗಂಗಿಲ್ರೀ. ಆಗಿನ್ನು ನಮ್ಮೂರಿನ ಟಾಕೀಸ್ ನಾಗ ಮಾರ್ನಿಂಗ್, ಮ್ಯಾಟ್ನಿ ಶೋ ಇದ್ದಲ್ರೀ. ಏನಿದ್ದರು ಪಸ್ಟ ಶೋ, ಸೆಕೆಂಡ್ ಶೋ ಅಷ್ಟನ. ನಾವು ಇನ ಸಣ್ಣರಿದ್ದವಲ ಅದಕ ಪಸ್ಟ ಶೋಗೆ ಹೋಗ್ತದ್ವಿ. ಟಿಕೀಟ ಅಂದ್ರ ನೋಡ್ರಪ ಬರೀ ಹನ್ನೆಲ್ಡಾಣೆ. ಗೊತ್ತಾಗಲಿಲ್ಲ ಅದರೀಪ 75 ಪೈಸೆ ಅಷ್ಟೇ. ಮುಂಜಾನೆ ಎತ್ತಿನ ಬಂಡಿಗ ಆ ಕಡೆ ಈ ಕಡೆ ಒಂದು ಸಣ್ಣ ಪೋಸ್ಟರ್ ಕಟ್ಟಿರೊರ್ರು. ಅದರಾಗ ಕೂತ್ಕೊಂಡು ಕೂಗ್ತಾ ಬರೋರು. “ಅಂದು ಮುಂದೆನ್ನದೆ ಇಂದೇ ಬಂದು ನೋಡಿರಿ ನಿಮ್ಮ ನೆಚ್ಚಿನ ಶೈಲಸಿರಿ ಟಾಕೀಸ್ ನಲ್ಲಿ ಹೊಚ್ಚ ಹೊಸ ಚಲನ ಚಿತ್ರ ಬಂಗಾರದ ಗುಡಿ. ನೋಡಲು ಮರೆಯದಿರಿ, ಮರೆತು ನಿರಾಶರಾಗದಿರಿ”. ಅಬ್ಬಾ ಆ ಕೂಗ ಕೇಳೀದ್ರನ ನಮ್ಗ ಸಿನಿಮಾಕ್ಕ ಹೋಗಂಗ ಅನಿಸ್ತಿತ್ತ.  ಅದು ಮ್ಯಾಲಿನ ಬಜಾರ್ದಾಗ ಒಂದ ದೊಡ್ಡ ಪೋಸ್ಟರ್ ಕಟ್ಟೋರು. ಅದು ಏನ ಅಂದ್ರ ನಾವಿದ್ದ ವಠಾರದಾಗಿಂದ ನಾಕ ಹೆಜ್ಜಿ ಹೊರಗ ಬಂದ್ರ ಭರ್ತಿ ಕಾಣದ. ಆಗನ ನಮ್ಮ ಮನಸಿನಾಗ ನೂರೆಂಟ ಸಿನಿಮಾ ಬಂದು ಹೋಗದ.

ಇಂತಿಪ್ಪ ಸಮಯದೊಳ್ ನಾನು ಅಪ್ಪನ ಕಾಡಿ, ಅಮ್ಮನ ಹತ್ರ ಗೋಗರೆದು ಹನ್ನಲ್ಡಾಣಿ ಗಿಟ್ಟಿಸ್ಗೊಂಡು ಸಿನಿಮಾ ನೋಡಕ ಹೋಗೊದು. ಸಿನಿಮಾ ಅಂದ್ರ ಸಾಕ ಹೋಟಲ್ ಮಂಜು ನೆನಪಾಗ್ತಿದ್ದ. ಯಾಕಂದ್ರ ಬರೋ ಎಲ್ಲಾ ಸಿನಿಮಾನು ಮೊದ್ಲ ನೋಡೊ ಕ್ಯಾಂಡಿಡೇಟ ಅಂದ್ರ ನಮ್ಮ ಮಂಜಣ್ಣ. ನಾವೆಲ್ಲ ಸೇರಿ ಸಿನಿಮಾಕ ಹೋಗೊರ್ರು. ಟಾಕೀಸ್ನಾಗ ಮೊದ್ಲು ಹಾಡು ಕೇಳಸದು. ಹಾಡ ಹತ್ತೆದ ಅಂದ್ರ ಇನು ಸಿನಿಮಾ ಶುರು ಆಗಿಲ್ಲ  ಅಂತನ. ಆದ್ರ ಆ ಮ್ಯುಸಿಕ್ ಇತ್ತ ನೊಡ್ರಿ ಅದು ಬಂತಂದ್ರ ಗಾಂಧೀ ರೀಲು ಚಲುವು ಆಗೇದಂತನ. ಟೂಡುಡು.. ಟೂಡುಡು.. ಟಟ್ಟುಟ್ಟು…ಟೂಡುಡು.. ಟೂಡುಡು.. ಟಟ್ಟುಟ್ಟು… ಅಂತ ಮ್ಯೂಸಿಕ ಬಂತಂದ್ರ ಸತ್ನೋ ಕೆಟ್ನೋ ಅಂತ ಓಡ್ತಿದ್ವಿ. ಹೋಗಿ ಒಂದ ನೆಲ ಕೊಡ್ರಿ ಅಂತ ಕೇಳಿ ಟಿಕೆಟ್ ಕೈಗ ಬಂತಂದ್ರ ಲಾಟರಿ ಹೊಡದಷ್ಟ ಖುಷಿ ಆಗೋದು. ಅಷ್ಟಕ್ಕು ನೆಲ ಅಂದ್ರ ಮೊಸಾಯಿಕ್, ಗ್ರಾನೈಟ್ ಹಾಸು ಅಂತ ಅನ್ಕೋಬ್ಯಾಡ್ರೀ. ಅದು ಉಸಿಗಿನ ನೆಲ ಅಷ್ಟ. ಅದರ ಮ್ಯಾಲ ಶಿವಾ ಅಂತ ಕೂತು ಸಿನಿಮಾ ನೋಡ್ತಿದ್ವೀ. ಒಬ್ಬರ ಕಾಲ ಮ್ಯಾಲ ಒಬ್ಬರ ಮಲಕೊಂಡು ನೋಡೊದು ಮಸ್ತಾಗಿತ್ರೀ.

ಹಿಂಗಿದ್ದಿರಬಹುದು ಅಂದುಕೊಳ್ಳಿ ನಮ್ಮ ಟಾಕೀಸು.

ಹಿಂಗಿದ್ದಿರಬಹುದು ಅಂದುಕೊಳ್ಳಿ ನಮ್ಮ ಟಾಕೀಸು.

ಅದೇನಾಯ್ತೊ ಗೊತ್ತಿಲ್ಲ ನಮ್ಮ ಸಿನಿಮಾದ ಸಂಕಪ್ಪ (ಟಾಕೀಸ್ ಓನರ್) ಉಸುಗ ತಗದು ಕರಿ ಬಂಡಿ (ಅದಕ ಪಾಟೀಕಲ್ಲು ಅಂತ ಹೇಳ್ತೀವಿ) ಹಾಕಿಸಿದ. ಅಲೆಲೆಲೆಲೆಲೆ, ಅದ್ರ ಮಾತ ಏನ ಹೇಳ್ತಿರಿ. ಅದು ಹೆಂಗ ಇತ್ತಪ ಅಂದ್ರ ಒಂತರ ಜಾರ ಬಂಡಿ ತರಹ ಇರೋದು. ಹಿಂದ ಒಂಚುರು ಎತ್ರ ಇದ್ರ ನೋಡಕ ಅನುಕೂಲ ಆಗ್ತದ ಅಂತ ಮಾಡಿದ್ರಪ. ಆದ್ರ ಏನ ಮಾಡ್ತೀರಿ ಮ್ಯಾಲಿಂದ ಸುಯ್ಯ ಅಂತ ತೀರ್ಥೋದ್ಭವ ಆದರೆ, ಮುಂದ ಕುತ ನಮಗ ಅಭೀಷೇಕನ ಗ್ಯಾರಂಟಿ. ಯಾವಾನಾದ್ರ ತಲೆ ಕೆಟ್ಟಿದ್ರ ಪರದಿ ಮ್ಯಾಲ ಸೆಂಟಿಮೆಂಟ್ ಇದ್ರು, ಇಲ್ಲಿ ದೊಡ್ಡ ಫೈಟಿಂಗ್. ಹಿಂಗಿಂಗೆಲ್ಲ ಮಾಡ ಬಾರ್ದು ಅಂತ ಗೊತ್ತಾಗಕ ಒಂದು ಹತ್ತ, ಹನ್ನ್ಯಾಲ್ಡ ಸಿನಿಮಾನ ಚೆಂಜ್ ಆಗಬೇಕಾತ.

ಆಮೇಲಿ ನಮಗ ಪ್ರಮೋಷನ್ ಸಿಗ್ತ. ಏನು ಅಂತೀರಾ.ನಾವು ನೆಲಕ್ಕ ಹೋಗರ್ರು,  ಬೆಂಚಿಗ ಹೋಗಕ್ಕತ್ತಿದ್ವಿ. ಆಗ ಟಾಕೀಸ್ ಗೆ ಫ್ಯಾನ್ ಹಾಕಿಸಿದ್ರು. ನಮ್ಮ ಅದೃಷ್ಟ ನೋಡ್ರೀ. ಫ್ಯಾನ್ ಏನಿದ್ರು ಬೆಂಚಿಗ ಮತ್ತ ಚೇರಿಗೆ ಅಷ್ಟ. ಹಂಗ ಸ್ವಲ್ಪ ವರ್ಷ ಹೋತು ಮತ್ತೊಂದು ಪ್ರಮೋಷನ್. ಆಗ ಚೇರಿಗೆ ಹೋಗಲಿಕ್ಕ ಹತ್ತಿದ್ವೀ. ಆ ಗತ್ತ ಬ್ಯಾರೇರೀ. ಆದ್ರ ಏನ ಹೇಳ್ರೀ ನೆಲದಾಗ ಕೂತ ನೋಡ ಮಜಾ ಮತ್ತ ಬರಲಿಲ್ರೀ. ಅಲ್ಲಿ ಕೂತ ಮಲಕೊಂಡು ನೋಡಿದ ಸಿನಿಮಾಗಳಿಗೆ ಲೆಕ್ಕ ಇಲ್ರೀ. ನನ್ನೊಳಗ ಒಂದು ಕಲ್ಪನಾ ಲೋಕ ಕಟ್ಟಿ ಕೊಟ್ಟದ್ದ ನಮ್ಮ ಕಿನ್ನಾಳ ಶೈಲಸಿರಿ ಟಾಕೀಸ್ ಅಂತ ಹೆಮ್ಮಿಂದ ಹೇಳಬಹುದು.

ಭಾಳ ವರ್ಷದಿಂದ ಅರ್ಧಕ್ಕ ನಿಂತಿದ್ದ,  ಏನೇನೋ ರೋಚಕ ಕತಿ (ಅದರಾಗ ಏಳು ಮಕ್ಕಳ ತಾಯಿ ದೆವ್ವದ, ಅದಕ ಎಷ್ಟು ಕಟ್ಟಿದ್ರು ನಿಂತುಗೊಳ್ಳಲ್ಲ ಅಂತಿದ್ರು. ಆದರ ಅದನ್ನ ಯಾರ ಕಟ್ಟಕ ನೋಡಿದ್ರು ಅಂತ ಸ್ವತಃ ಮಾಲೀಕ ಸಂಕಪ್ಪಗ ಗೊತ್ತಿರಲಿಲ್ಲ) ಹುಟ್ಟ ಹಾಕಿದ್ದ ಸಿನಿಮಾದ ಸಂಕಪ್ಪನ ಹೊಸ ಟಾಕೀಸ್ ನಾನು ಡಿಗ್ರಿ ಒಳಗ ಇರಬೇಕಾದ್ರ ರೆಡಿ ಆಗಿತ್ತು. ಓದ್ಲಿಕ್ಕೆ ಬೆಂಗಳೂರ್ನಾಗಿದ್ದ ನಾನ ಒಂದ ಸಲ ಊರಿಗ ಹೋದಾಗ “ವಂದೇ ಮಾತರಂ” ಅನ್ನೋ ಸಿನಿಮಾ ನೋಡಕ ಹೋಗಿದ್ದೆ. ಆದ್ರ ಏನ ಹೇಳ್ರೀ ಆ ಹಳೆ ಟಾಕೀಸ್ನಾಗ ನೆಲ್ದ ಮ್ಯಾಲ ಕುತ ನೋಡಿದ್ದ ಮಜಾ ಈ ಹೊಸ ಟಾಕೀಸ್ನನ ಕುರ್ಚಿ ಮ್ಯಾಲ ಕೂತ ನೋಡಿದಾಗ ಸಿಗಲಿಲ್ರೀ. ಆಗಿನ ನೆನಪುಗಳು ಈಗಲು ರಂಗ ರಂಗಾಗಿ ಹಂಗ ಉಳಿದ ಹೋಗ್ಯಾವ. ಹೊಸ ಪಿಚ್ಚರ ಅಂದ್ರ ಬಂಡಿ, ಟ್ರ್ಯಾಕ್ಟರ್ ತಗೊಂಡು ಬರೋ  ಜನ. ಪರದಿ ಮ್ಯಾಲಿನ ಕಷ್ಟ ತಂಬದ ಅಂತ ಗೋಳೋ ಅಂತ ಅಳೋ ಹೆಂಗಸ್ರು. ಬಲು ಗತ್ತಿಲೆ ಸಿನಿಮಾಕ್ಕ ಬರೋ ಕೆಲವು ಪುಢಾರಿ ಯುವಕ್ರು. ಹೆಣ್ಣು ದೇವತೆಗಳ ಸಿನಿಮಾ ಅಂದ್ರ ಹೆಂಗಸ್ರಿಗೆ ಸಿಗೋ ಹಸಿರು ಬಳಿಗಳು. ಅಬ್ಬಾ! ಆದೆಷ್ಟು ಚೆಂದಾಗಿತ್ರಿ ಆ ಜಮಾನಾ. ನೆನಪಿನ ಬುತ್ಯಾಗ ಇನ್ನು ಎಷ್ಟೋ ವಿಷಯಗಳು ಹಂಗ ಉಳಿದಾವು. ಅದನ್ನ ಇನ್ನೊಮ್ಮೆ ಯಾವತ್ತಾದ್ರು ಕುಂತು ಮತ್ತ ಬರೋಬ್ಬರಿ ಹೇಳ್ತೀನಿ. ಏನಂತಿರ್ರೀ……

 

ಟ್ಯಾಗ್ ಗಳು:

 
%d bloggers like this: